Kryeministri Edi Rama u ndal te masa e rritjes së pensioneve, duke theksuar se përmirësimi i situatës ekonomike ka krijuar mundësitë për rritje të pensioneve çdo vit. Ai nënvizoi se ky proces është tashmë i planifikuar dhe nuk varet nga faktorë të paparashikueshëm.

“Sistemi është i planifikuar, kështu që pensioni që u rrit në janar të këtij viti do të dyfishohet në janarin e vitit tjetër, më pas do të trefishohet në janarin e 2028-s, do të bëhet katërfish në janarin e 2029-s dhe pesëfish në janarin e 2030-s,” tha Rama, duke shpjeguar mekanizmin e rritjes së përvitshme.

Kreu i Qeverisë vuri në dukje se rritja e mundësive financiare lidhet drejtpërdrejt me zhvillimin ekonomik të vendit. Ai theksoi se një ekonomi më e fortë i mundëson shtetit të rrisë pensionet dhe pagat pa rrezikuar stabilitetin financiar.

Rama u ndal gjithashtu tek kritikat që lidhin këtë rritje me korrupsionin. Ai argumentoi se nëse korrupsioni do të kishte qenë në nivele të larta, të ardhurat e shtetit nuk do të kishin shënuar rritje dhe nuk do të ishte e mundur rritja e pensioneve dhe e pagave.

“Është e qartë se të ardhurat e shtetit janë rritur dhe kjo është dëshmi se ekonomia funksionon. Ata që flasin për rritjen e korrupsionit duhet ta kuptojnë se pa një ekonomi të fortë, nuk do të mund të realizonim këto masa,” përfundoi Rama.