Kjo javë ka nisur nën ndikimin e masave të ngrohta ajrore, që do të vazhdojë edhe të martën. Megjithatë, pritet një destabilizim i lehtë i atmosferës, me mundësi për ndonjë rrebesh të izoluar lokal gjatë orëve të pasdites.

Nga dita e mërkurë, masat e ftohta ajrore do të përhapen gradualisht, duke sjellë shtim të vranësirave dhe reshje lokale shiu gjatë pasdites dhe mbrëmjes, si dhe ulje të theksuar të temperaturave. Të enjten, ndikimi i këtyre masave të ftohta polare do të vijojë, me mot kryesisht të vranët dhe reshje shiu, ndërsa në zonat malore priten reshje bore.

Të premten pritet mot me alternim kthjellimesh dhe vranësirash, ndërsa lokalisht mund të ketë reshje të izoluara shiu, dhe borë në zonat malore. Në mëngjes, temperaturat mund të zbresin deri në vlera negative, dhe nuk përjashtohet mundësia e paraqitjes së fjollave të borës edhe në zonat më të ulëta, veçanërisht në zonën e Llapit.

Të shtunën, moti pritet kryesisht me diell dhe vranësira, me reshje të pakta lokale shiu, dhe temperatura e mëngjesit do të jetë negative në disa zona. Dita e diel do të vijojë me diell dhe vranësira, me mundësi për reshje të izoluara, ndërsa temperaturat maksimale do të shënojnë rritje.

Era do të fryjë kryesisht nga verilindja, me shpejtësi nga 15 deri në 52 km/h. Temperaturat minimale do të lëvizin nga -2 deri në 9°C, ndërsa ato maksimale nga 6 deri në 26°C, duke reflektuar ndryshimet nga ndikimi i masave të ngrohta dhe të ftohta ajrore.