Ish-deputetja Monika Kryemadhi foli së fundmi për pasurinë e saj dhe familjes në emisionin “Log”, duke theksuar se për të pasuria nuk janë paratë, por familja. Ajo tha se mund të kesh paratë, por nuk është gjithçka, dhe se nuk ndihet as e pasur e as e varfër.

Kryemadhi rikujtoi periudhën nga viti 1995, kur apartamenti i saj tek “Shallvaret” u jepte me qira përmes kontratave të noterizuara. Ajo theksoi se prej 9 vitesh familja kishte përfituar rreth 200 mijë dollarë vetëm nga këto qira.

Ajo u ndal gjithashtu tek pretendimet e SPAK për shitjen e një apartamenti në Qerret, duke thënë se gjithçka ishte deklaruar ligjërisht. Sipas saj, prokurorët kanë “mbyllur sytë” për dokumentacionin ekzistues dhe pretendojnë të kundërtën.

Kryemadhi theksoi se apartamenti i Qerretit u ble në 2002 dhe u shit në 2006 për 300 mijë euro cash, duke deklaruar gjithçka me Ilir Metën. Ajo shtoi se dokumentat e noterizuara dhe mandatet e tatimeve janë prova të qarta të burimeve të pasurisë së familjes.

Në fjalën e saj, Kryemadhi u shpreh se nuk merret me pasuritë e të afërmve dhe se të ardhurat e saj janë të bazuara në kontrata të qirave të notarizuara dhe dokumente ligjore. Shitja e banesës dhe blerja e shtëpisë në Bllok u kryen me fonde të deklaruara, pa elemente të pastrimit të parave.