Siç mund të shihni në fotografinë kryesore reshjet atmosferike gjatë kësaj jave do të mbesin prezente që nga Iberia në Mesdheun perëndimor, Itali, Afriken veriore, jug të Frances, Gadishullin Ballkanik e deri në Turqi dhe euroazi. Kjo nënkuptohet për shkak të dominancës së masave të fuqishme dhe të vazhdueshme ajrore ciklonike.

Në anën tjetër në Britaninë e Madhe pjesë të Evropes qendrore, perëndimore dhe Skandinavi do të ketë mungesë të reshjeve atmosferike dhe mot shumë të mirë pranveror për shkak të dominancës së fuqishme të masave arjore anticiklonike.

Pra, në territoret tona do të vazhdojnë rrebeshet pothuajse të përditshme të shiut, madje pritet intensifikim e tyre. Reshjet do të jenë tipike pranverore dhe verore, pra të karakterit lokal. Përderisa shumë vise do të përfitojnë sasi të reja të madhe reshjesh të shiut, vise tjera do të mbesin me pak reshje dhe kjo do të varet nga vendi i krijimit dhe zhvillimt të stuhive lokale.

Intensifikim të stuhive lokale do të kemi veçanërisht në viset kontinentale të Shqipërisë, Maqedonisë së Veriut dhe nganjëherë edhe në Republikën e Kosovës. Normalisht nuk do të mungojnë intervalet kohore me diell dhe periudhat pa reshje fare.

Edhe një javë me reshje lokale, pothuajse të përditshme, vende-vende, herë pas here intensive. Priten rrebeshe lokale intensive kryesisht orëve të pasdites dhe mbrëmjes, por nganjëherë edhe orëve të natës. Do të ketë shanse të forta për krijimin e disa stuhive të fuqishme lokale që mund të jenë problematike me erëra të fuqishme dhe breshër.

Në aspektin termik, temperaturat do të mbesin rreth vlerave mesatare, pra pritet të ketë rritje të lehta të tyre, por në kohën e rrebesheve dhe vranësirave ato pësojnë ulje. Në përgjithësi temperaturat do të lëvizin nga 20 deri në 25 gradë Celsius, në Shqipëri pak më ngrohtë./METEOBALLKAN