Një person ka humbur jetën dhe një person i humbur pas kushteve të rënda atmosferike të krijuara nga stuhia “Daniel” që goditi Greqinë.

Sipas raportimeve fillestare, një blegtor 70-vjeçar ka humbur jetën në zonën Agios Georgios të Ano Volos, kur u shtyp nga një mur pranë shtëpisë së tij që u shemb nga një sasi e madhe uji. Sipas informacioneve, fermeri po tentonte t’i afrohej kafshëve të tij.

Një tjetër person rezulton i zhdukur në zonën e Volos, pasi makina e tij u përfshi nga një përrua. Situata më e vështirë është në Volos, ku rrugët, shtëpitë dhe automjetet janë përmbytur, si dhe janë shkatërruar pemë të shumta. Meteorologët bëjnë të ditur se moti i keq do të vazhdojë edhe në orët në vijim.

Kryebashkiaku i Volos përsëriti apelin që njerëzit të qëndrojnë në shtëpi dhe postoi në Facebook foto të kaosit pas stuhisë. Në rrjetet sociale janë publikuar edhe video të plazheve të zbrazëta dhe të shkatërruara në Greqi, pas stuhisë që rrëmbeu shezlongët dhe çadrat.