Deputeti i Partisë Demokratike të Kosovës, Xhavit Haliti, ka bërë publik deklarimin e pasurisë në Agjencinë për Parandalimin e Korrupsionit, duke zbuluar asete të konsiderueshme në prona të paluajtshme, kursime bankare dhe pasuri të tjera.

Sipas deklarimit, ai zotëron një banesë prej 75.5 m² me vlerë 200 mijë euro, të blerë nga kursimet familjare. Gjithashtu ka në pronësi të përbashkët një shtëpi prej 250 m² dhe 4 hektarë tokë të trashëguar, me vlerë totale rreth 600 mijë euro.

Në pasuritë e tij përfshihet edhe një arë mbi 1 mijë m² e blerë në vitin 2024 për 32 mijë euro, si dhe tokë pyjore prej 4.35 hektarësh me vlerë 20 mijë euro. Sa i përket pasurive të luajtshme, ai ka deklaruar një veturë Land Rover (2000) me vlerë 5 mijë euro dhe një Mercedes-Benz (2023) me vlerë 20 mijë euro, si dhe stoli ari rreth 30 mijë euro.

Një pjesë e madhe e pasurisë së tij ndodhet në banka, me mbi 230 mijë euro kursime në disa institucione financiare në Kosovë, përfshirë edhe mjete nga trusti pensional. Në deklarim nuk përfshihen aksione, kriptovaluta apo detyrime financiare si kredi, në kuadër të obligimeve ligjore për transparencë.