Një ditë më parë Tirana u përball me pamje të frikshme, teksa një nga pallatet e kompleksit “Arlis”, pranë Farmacia 10, në pronësi të biznesmenit Armand Lilo, u përfshi nga flakët e një zjarri të përmasave të mëdha. Flakët u përhapën me shpejtësi, duke krijuar panik dhe pasiguri te banorët e zonës, ndërsa tymi i dendur mbuloi qiellin dhe vështirësoi çdo përpjekje për ndërhyrje të menjëhershme.

Në një situatë që për pak çaste u kthye në ankth për dhjetëra familje, në skenë hynë zjarrfikësit, të cilët u shndërruan në heronjtë e vërtetë të asaj dite. Ata vepruan me guxim dhe vendosmëri, duke sakrifikuar pa hezitim dhe pa marrë parasysh rrezikun serioz që u kanosej jetës së tyre, me qëllimin e vetëm për të shpëtuar qytetarët e bllokuar mes flakëve.

Mes tymit të dendur dhe copëzave të fasadës që shkëputeshin nga ndërtesa, një prej momenteve më prekëse ishte ai i një zjarrfikësi që, edhe pse i papajisur plotësisht me uniformën dhe mjetet mbrojtëse, vendosi të hyjë në flakë për të shpëtuar një qytetare në rrezik. Ai kishte vetëm një kokore në kokë, por nuk hezitoi ta përdorë atë për të mbrojtur jetën e tjetrit.

Bëhet fjalë për shefin e Stacionit të Zjarrfikëses Kinostudio, Jonus Murataj, i cili jo vetëm ia vendosi kokoren qytetares, por edhe e përqafoi për t’i dhënë kurajo dhe siguri. Ky gjest human dhe plot ndjeshmëri tregoi se përtej detyrës, ekziston një përkushtim i thellë ndaj jetës dhe dinjitetit njerëzor, duke e kthyer atë moment në një simbol shprese dhe solidariteti.