Larja e rrobave në temperatura më të ulëta se 60 gradë Celsius mund të përbëjë rrezik për shëndetin. Në këto kushte, bakteret nuk eliminohen plotësisht dhe mund të mbeten në tekstile edhe pas larjes.
Ndër bakteret më të përhapura është Escherichia coli, i cili mund të transmetohet lehtësisht përmes rrobave të palara siç duhet. Edhe pse shpesh jeton natyrshëm në organizëm, disa forma të tij mund të shkaktojnë probleme serioze shëndetësore.
Këto përfshijnë infeksione urinare dhe të zorrëve, të cilat në raste të rënda mund të bëhen të rrezikshme për jetën. Për këtë arsye, temperaturat e ulëta nuk janë gjithmonë të mjaftueshme për të garantuar higjienë të plotë.
Megjithëse larja në 30 gradë është më ekonomike dhe më e shpejtë, duhet pasur parasysh se bakteret mbijetojnë në temperaturën e trupit rreth 37 gradë. Prandaj rekomandohet larja mbi këtë nivel, idealisht mbi 60 gradë, sidomos për çarçafët dhe këllëfët e jastëkëve, të cilat duhen pastruar rregullisht për të ruajtur higjienën.
