Zhvilime të rëndësishme janë njoftuar pasditen e së shtunës.
Dhëndri i Sali Berishës, Jamarbër Malltezi, u vu në pranga me urdhër të SPAK. Ai ishte duke pritur bashkëshorten e tij, e cila po kthehej nga një vend i Bashkimit Europian, kur është ndaluar në ambientet e aeroportit të Rinasit nga autoritetet që i komunikuan akuzat. Po ashtu për Malltezin është vendosur sekuestro për të gjitha pasuritë të tij.

Vetëm pak minuta më vonë u bë me dije se gjykata ka caktuar detyrim paraqitje dhe ndalim të daljes jashtë vendit edhe për liderin e opozitës, Sali Berisha, nën akuzën për korrupsion pasiv, pastrim parash dhe fshehje të pasurisë.

Gjyqtarja e GJKKO-së që firmosi masën e sigurisë për Sali Berishën dhe arrestimin e dhëndrit të tij, Jamarbër Malltezi, mësohet se është Enkeleda Millonai, ndërsa masat e sigurisë janë kërkuar nga prokurori i SPAK, Arben Kraja.

Mbi Jamarbër Malltezin, rëndojnë akuza e korrupsionit, neni 260 bashkë me Berishën dhe neni 287 korrupsion në bashkëpunim me Fatmir Bektashin. Po ashtu i ndaluar. Ndërsa Fatmir Bektashi akuzohet për korrupsion aktiv neni 245 dhe neni 287 në bashkëpunim me Malltezin.

Brenda pesë ditëve, siç thotë ligji do të bëhet verifikimi i masave të kërkuara nga SPAK e të vendosura nga gjykata. Ndërsa Malltezit i verifikohet brenda 72 orëve nga ekzekutimi, pasi ai është nën masën “arrest me burg”.

E vetmja dosje me të cilën lidhet emri i Malltezit dhe për të cilën është kallëzuar në SPAK është ajo e privatizimit të ish klubit sportiv “Partizani”.

Padia në SPAK për këtë dosje është çuar nga Ministri i Brendshëm, Taulant Balla në kohën kur ishte kreu i grupit të Partisë Socialiste.

Malltezi në atë kohë u thirr nga SPAK dhe u mor në pyetje për këtë çështje ndërsa duket se Prokuroria e Posaçme ka gjetur provat e mjaftueshme për të arrestuar dhëndrin e ish-kryeministrit, që rezulton të jetë një prej pronarëve kryesorë të pallateve që fshiu gjurmët e kompleksit Partizani.

Bëhet fjalë për një pronë me rreth 10.000 m2, në qendër të Tiranës që në vitin 2008 është privatizuar me një vlerë prej 100.000 dollarë, më pak se vlera e një garsoniere të shitur në atë zonë.

Klubi sportiv “Partizani” ishte kompleksi më i rëndësishëm sportiv në pronësi të Ministrisë së Mbrojtjes, jo shumë larg nga qendra e Tiranës, ku sot janë ngritur 17 kulla.