Bashkitë e Shqipërisë mund të marrin më shumë ose më pak fonde vitin e ardhshëm. Paratë do të ndahen dhe përcaktohen në bazë të rezultateve të CENSIT për popullsinë dhe banesat.

Popullsia e Shqipërisë dhe numri i banesave nga ‘CENSI 2023’, do të ndryshojnë skemën e financimit të bashkive në vend.

INSTAT do të publikojë të dhënat në muajin Qershor, ndërsa në fundit të vitit do të jetë Ministria e Financave, ajo që do të bëjë rishpërndarjen e fondeve për 61 njësitë e pushtetit lokal.

Deri më tani fondet për bashkitë janë bërë sipas një formule që lidhet me administrimin e tyre në 42 funksione, por me panoramën e re që do të japë CENSI do të ndërtohet edhe formula e re e transfertës së pakushtëzuar.

Në Strategjinë për Menaxhimin e Financave, thuhet se gjetjet e Censit do të shërbejnë për të parandaluar dhe korrigjuar veçanërisht çrregullimet demografike të dekadës së fundit.