Një ngjarje e rëndë është raportuar nga Miloti, ku fuga metalike të një ure janë dëmtuar gjatë një tentative për grabitjen e tyre. Dyshohet se autorët synonin t’i merrnin për t’i shitur për skrap.

Lajmi është bërë i ditur nga Autoriteti Rrugor Shqiptar, i cili thekson se rasti është referuar menjëherë pranë Drejtorisë Vendore të Policisë Lezhë. Sipas këtij institucioni, bëhet fjalë jo vetëm për dëmtim të pronës publike, por edhe për një rrezik të drejtpërdrejtë për sigurinë e mjeteve që qarkullojnë në këtë segment rrugor.

Ndërkohë, dëmtimi është riparuar nga grupet e mirëmbajtjes dhe qarkullimi në Urën e Milotit vijon normalisht. ARRSH bën me dije se është njoftuar mëngjesin e sotëm nga kompania kontraktore për një dëmtim të qëllimshëm dhe ka dërguar menjëherë inxhinierët në terren për verifikimin e situatës.

Ky akt cilësohet si i turpshëm, veçanërisht pasi ndodh në një segment me qarkullim të lartë, sidomos në prag të sezonit veror. Vjedhja e fugave metalike përbën rrezik serioz, pasi hapësirat e krijuara në trupin e urës janë të thella dhe mund të shkaktojnë pasoja për automjetet që kalojnë në këtë aks.