Në një konferencë për shtyp të zhvilluar këtë të enjte, ministrja e Shëndetësisë Evis Sala, së bashku me drejtoreshën e Qendra Spitalore Universitare “Nënë Tereza”, Anxhela Paparizo, folën mbi gjendjen aktuale të sistemit shëndetësor në vend dhe sfidat me të cilat përballet sektori.

Një nga temat kryesore të diskutimit ishte mungesa e barnave dhe terapive për pacientët që vuajnë nga sëmundje të rënda. Sipas tyre, institucionet shëndetësore po përpiqen të menaxhojnë situatën dhe të garantojnë trajtimin e nevojshëm për pacientët.

Gjatë konferencës, drejtoresha Paparizo u pyet edhe për akuzat e shpeshta mbi korrupsionin në spitale, ku pacientët në disa raste pretendojnë se detyrohen të paguajnë për shërbime që sipas ligjit duhet të ofrohen falas.

Ajo deklaroi se nuk ka dijeni për raste të tilla dhe se deri më tani nuk është raportuar asnjë denoncim zyrtar në institucionet përkatëse lidhur me marrje parash nga mjekët.

“Në dijeninë time nuk kam njohuri për marrje lekësh. Gjithashtu nuk kemi asnjë denoncim në strukturat përkatëse për marrje lekësh nga mjekët,” u shpreh Paparizo gjatë konferencës për shtyp.