Kanë nisur zyrtarisht punimet për ndërtimin e aksit të ri rrugor Janinë–Kakavijë, një projekt me rëndësi ndërkufitare që synon rritjen e sigurisë rrugore, uljen e kohës së udhëtimit dhe forcimin e lidhjes mes Greqisë, Shqipërisë dhe vendeve të Ballkanit Perëndimor.

Në terren kanë filluar punimet përgatitore, ku përfshihen pastrimi i zonës nga bimësia, punimet tokësore dhe nivelimi i terrenit me mjete të rënda, duke shënuar nisjen konkrete të ndërtimit të rrugës së re.

Kontrata për realizimin e projektit, me vlerë 310 milionë euro, është firmosur në dhjetor 2024 dhe sipas autoriteteve greke, aksi pritet të përfundojë brenda katër viteve.

Aksi do të ketë një gjatësi prej 70 kilometrash dhe do të jetë vazhdim i Autostradës Joniane, duke lidhur Janinën me pikën kufitare të Kakavijës. Projekti përfshin dy segmente kryesore: Janinë–Kalpak me trase të re dhe Kalpak–Kakavijë, që parashikon modernizimin e rrugës ekzistuese.

Rruga do të projektohet me standarde moderne, me dy korsi për çdo drejtim dhe korsi emergjence, duke mundësuar shpejtësi deri në 100 km/orë dhe duke garantuar siguri më të lartë për përdoruesit.

Përfundimi i këtij aksi pritet të shkurtojë ndjeshëm kohën e udhëtimit nga Athina drejt kufirit me Shqipërinë, duke e çuar në rreth 4 orë e 30 minuta dhe duke sjellë përfitime të mëdha në transport dhe ekonomi.

Gjithashtu, rruga do të lehtësojë trafikun, do të përmirësojë aksesin drejt porteve dhe zonave industriale, si dhe do të forcojë lidhjet ekonomike dhe lëvizjen ndërkufitare mes rajoneve të Greqisë dhe Shqipërisë.