Edhe pse prej më shumë se dy shekujsh stërgjyshërit e Aleksander Lekhov, shqiptarit të Ukrainës nga qyteza Karakurt në Odesë emigruan nga vendi amë, gjuha zakonet dhe traditat nuk i harroi.

Teksa viziton Muzeun Historik të Krujës Aleksandri tregon lidhjen që ndjen me Shqipërinë.

“E kemi ruajtur gjuhën tonë, traditat tona. Në kohën e osmanëve shqiptarët janë larguar dhe kanë shkuar në tokën ku është sot Ukraina, por kemi ruajtur deri më sot gjuhën shqipe”, tregon ai.

Aleksandri ka një thirrje për të gjithë prindrit shqiptarë në mbarë botën.

“O prind shqiptar, mësojini gjuhën shqipe fëmijëve tuaj sepse është shumë e shenjtë për ne shqiptarët”, thotë Aleksander Lekhov.

Shqiptarët ortodoksë migruan në territorin e Ukrainës në mes të shekullit të XVIII, kur këto toka ndodheshin nën pushtimin e perandorinë ruse. Në atë kohë, shumica e tyre përbëhej nga vullnetarë shqiptarë që kishin shërbyer në Marinën ruse gjatë luftës ruso-turke. Pasi lufta mbaroi, ata u vendosën rreth Odesës.