Serena Kovaçi, bashkëshortja e drejtorit të ujësjellësit të falimentuar të Durrësit, Spartak Kovaçi, dyshohet se është përfshirë në pastrim parash, përmes shitjes dhe blerjes së makinave.

Referuar regjistrave të pasurive dhe disa transaksioneve bankare, Serena Kovaçi, punonjëse në Bashkinë e Durrësit, ka blerë makina luksoze duke i deklaruar me vlerë më të ulët se sa çmimi real, ndërsa vite më vonë, i ka shitur me çmim më të lartë, edhe pse me kalimin e viteve çdo makine i bie vlera.

Ndërkaq, Spartak Kovaçit, një nga drejtorët më të lakuar për korrupsion në Shqipëri, rezulton se i kanë kaluar në llogari qindra mijëra euro, në formë dhuratash.

Vetëm në një rast, në dhjetor 2014, në llogarinë e Spartak Kovaçit kanë kaluar 100 mijë euro nga kompania Adriatik shpk, me pronar Petrit Kovaçi, babai i Spartak Kovaçit.

Burimi i këtyre parave dyshohet se janë aferat korruptive me tendera të drejtorit të Ujësjellësit Durrës, Spartak Kovaçit, por që kompania Adriatik shpk është përdorur për mbulimin e tyre.

Nga verifikimet e bilanceve të kompanisë Adriatik shpk dhe ndarja e dividentit, shumat që kompania ka kaluar në llogari të Kovaçit, nuk justifikohen. Aq më tepër që Petrit Kovaçi ka vetëm 50 % të aksioneve në këtë kompani, e cila ka marrë 10 tendera publikë me flamur korrupsioni, në kohën kur i biri Spartak Kovaçi ishte drejtor i Ujësjellësit të Durrësit, të cilin e falimentoi dhe e zhyti në një borxh me vlerë mbi 160 milionë euro.

Jemi para indicieve të forta të korrupsionit dhe pastrimit të parave nga Spartak Kovaçi, i cili me para të pista po ndërton edhe një hotel në Durrës me vlerë miliona euro, bashkë me vëllain e Ceno Klosit, drejtor i Tatimeve.

Në vitin 2011, Kovaçi ka blerë një apartament në Durrës me vlerë rreth 100 mijë euro. Edhe këtyre parave nuk u dihet burimi.