Një burrë britanik po lufton për të mbijetuar pasi një tren i vjetër me avull që transportonte dhjetëra turistë doli nga shinat ndërsa kalonte një vargmal argjentinas.

La Trochita, një tren turistik emblematik doli nga shinat ndërsa transportonte 53 persona në provincën e Rio Negro të shtunën. Mes turistëve, të cilët ishin kryesisht amerikanë, katër u plagosën dhe u dërguan në spitale të ndryshme në të gjithë rajonin.

Një britanik u dërgua në një spital në Ingeniero Jacobacci, ku u trajtua fillimisht për mavijosje dhe kontuzionet e vogla. Më pas, ai u transferua në Spitalin Zonal të Bariloche për t’iu nënshtruar skanimeve. Por të dielën në mëngjes, autoritetet lokale raportuan se gjendja e tij ishte përkeqësuar. Burri i paidentifikuar u shtrua në njësinë e kujdesit intensiv për shkak të një aritmie kardiake. Deri më tani nuk janë dorëzuar raporte të reja. Aksidenti ndodhi pak më pak se katër milje nga Río Chico. Në atë kohë, treni kishte 53 pasagjerë të huaj në bord, të cilët ishin referuar në qendra të ndryshme shëndetësore në El Maitén dhe Ingeniero Jacobacci.

Sipas burimeve lokale, aksidenti ka ardhur si pasojë e dëmtimeve në terren të trasesë, por ende nuk dihet shkaku zyrtar.

Normalisht, La Trochita ofron shërbim midis Ingeniero Jacobacci dhe stacionit Ojos de Agua, ku zakonisht mbërrin në orën 13:15. Por turistët e huaj kishin marrë me qira një rrugë të veçantë për në Ñorquinco, 100 milje nga stacioni i nisjes.