Puna e kësaj kompanie lidhet me prodhimin e metalit dhe eksportin e tij brenda dhe jashtë Kosovës, ku janë të punësuar mbi 50 punëtorë. Megjithatë, ky numër nuk është i mjaftueshëm për të përballuar kërkesat e punës në këtë biznes në Ferizaj.

Pronari Nijazi Musliu thotë se ka vështirësi serioze për të gjetur profesionistë të fushës, pavarësisht konkurseve të hapura së fundmi. Sipas tij, problemi nuk lidhet me pagat, pasi ato variojnë nga 1,000 deri në mbi 2,000 euro, në varësi të kualifikimit dhe pozitës së punëtorëve. Ai thekson se të rinjtë nuk shohin më perspektivë për të punuar në Kosovë dhe shpesh largohen pas vetëm pak ditësh pune.

Për shkak të mungesës së fuqisë punëtore vendore, kompania është detyruar t’u drejtohet sërish punëtorëve të huaj, veçanërisht nga vendet aziatike si Bangladeshi dhe Indonezia. Megjithatë, përvojat e mëparshme nuk kanë qenë të qëndrueshme, pasi shumë prej tyre janë larguar pas disa muajsh. Aktualisht, kompania është në pritje të miratimit të vizave për punëtorë të rinj nga Indonezia.

Kjo situatë nuk është e izoluar, pasi shumë biznese në Kosovë përballen me mungesë të fuqisë punëtore, sidomos pas liberalizimit të vizave. Sipas Jusuf Azemit, rreth 180 mijë punëtorë kanë emigruar dhe nuk janë kthyer më. Ai thekson se problemet si mungesa e transparencës, mosrespektimi i të drejtave të punëtorëve dhe vonesat në paga po ndikojnë në këtë situatë, ndërsa shkalla e papunësisë në Kosovë mbetet rreth 13.9%.