Ngjarje e rëndë në Korçë. Burri tenton ti presë këmbët gruas me motosejkë, më pas qëllon edhe djalin në kokë. Nënë e bir kanë përfunduar në spital, ndërsa burri është ngujuar në banesë dhe i bën rezistencë policisë duke qëlluar drejt saj.

Policia Korçë informon se ‘shërbimet e Policisë, janë njoftuar se në fshatin Qesarakë, Maliq, Ramiz Muçollari, 62 vjeç, kishte dëmtuar me mjet prerës në këmbë bashkëshorten e tij Pëllumbesha Muçollari, 58 vjeçe dhe me mjet të fortë në kokë djalin e tij Kamber Muçollari, 27 vjeç, të cilët aktualisht ndodhen në spitalin e Korçës, në kujdesin e mjekëve.

Pas marrjes së këtij njoftimi, menjëherë shërbimet e Policisë kanë shkuar drejt adresës së dhënë, ku kanë konstatuar të mbyllur në banesën e tij autorin e dyshuar Ramiz Muçollari, i cili është i armatosur me armë zjarri.

Shërbimet e Policisë kanë mbajtur të rrethuar banesën dhe kanë marrë masa sigurie, pasi 62-vjeçari ka hapur zjarr në drejtim të Policisë lokale.

Në vendngjarje, kanë mbërritur Forcat Speciale “Renea”, të cilët në bashkëpunim me strukturat e DVP Korçë, si dhe shërbimet e Komisariatit të Policisë Maliq, po mbajnë të rrethuar zonën dhe po negociojnë me Ramiz Muçollarin që ai të dorëzohet, por 62-vjeçari nuk ka pranuar dhe vijon të qëllojë në drejtim të forcave të Policisë.

Sipas deklarimeve paraprake të marra familjarëve të tij, dyshohet se shtetasi Ramiz Muçollari, vuan nga probleme të shëndetit mendor.Operacioni për kapjen e tij, po vijon’.