Kancelari gjerman Olaf Scholz tha të dielën se presidenti rus Vladimir Putin nuk e ka kërcënuar as atë dhe as Gjermaninë.

Ai i ka bërë këto deklarata në një intervistë për gazetën gjermane, Bild. Ish-kryeministri britanik, Boris Johnson, i ka thënë transmetuesit britanik, BBC, se udhëheqësi rus e ka kërcënuar atë me një sulm me raketa që mund të ndodhë “brenda një minute”.

Kremlini ka thënë se Johnson gënjeu. Scholz tha se në bisedimet që pati me Putinin, ai e bëri të qartë se ata kanë qëndrime shumë të ndryshme për luftën në Ukrainë.

“Unë ia bëj shumë të qartë Putinit se Rusia është përgjegjëse e vetme për luftën,” tha Scholz.

“Rusia ka pushtuar fqinjin e saj pa arsye, për të marrë disa pjesë ose të gjithë Ukrainën nën kontrollin e saj”, tha Scholz.

Gjermania beson se veprimet e Rusisë shkelin kuadrin evropian për paqen, prandaj i ka ofruar Ukrainës ndihmë financiare, humanitare dhe ushtarake.

Scholz ka thënë se ka një marrëveshje me presidentin ukrainas Volodymyr Zelensky se armët e siguruara nga Perëndimi duhet të përdoren vetëm në territorin ukrainas, jo në atë rus.

“Ne kemi një konsensus në këtë aspekt”.

Pas presionit në rritje, Qeveria gjermane ka miratuar së fundmi vendimin për dërgimin e tankeve moderne Leopard 2 në Ukrainë. Scholz tha se dorëzimi i këtyre armëve ishte koordinuar me kujdes me aleatët perëndimorë, në mënyrë që të shmangeshin përshkallëzimet e mëtejshme.

Presidenti rus, Vladimir Putin, e quan luftën e nisur më 24 shkurt të vitit të kaluar si një “operacion special ushtarak” për të çmilitarizuar Ukrainën.

Perëndimi i është përgjigjur Rusisë, duke goditur ekonominë e këtij vendi me sanksione të ashpra. Si rezultat i luftës, mijëra njerëz kanë vdekur dhe miliona të tjerë janë shpërngulur nga shtëpitë e tyre.