Vetëm për puro Cohiba Behike shpenzon mbi 25 mijë euro në muaj ose rreth 300 mijë euro në vit. Vera, 6 mijë euro një shishe, është zakonshme në çdo darkë që shtron.

Bën një jetë të shfrenuar mes Tiranës dhe Vjenës. Pasuria e deklaruar është qindra mijëra euro, ndërsa pasuria e fshehur, produkt i aferave epike korruptive në OSHEE, ka një vlerë dhjetëra milionë euro.

Bëhet fjalë për multi-miliarderin Ardian Çela, ish drejtorin e OSHEE gjatë viteve 2014-2023, një nga ikonat e korrupsionit në Shqipëri nën sqetullat e Damian Gjiknurit.

Ardian Çela është i pari drejtor, i cili krijoi një bandë të armatosur në OSHEE, për të mbrojtur aferat dhe linjat e vjedhjes së parave publike.

Kujtojmë se Çela, ashtu si ortaku i tij në rrugën e pasurimit Vangjush Dako, rezulton i përfshirë në dosjen “339”. Në të paktën një rast, prokuroria ka vërtetuar se Ardian Çela i ka dhënë një tender 1.2 milionë euro një kompanie që përfaqësonte klanin kriminal Avdylaj të Shijakut. Megjithatë, ky implikim mund të jetë elementi më periferik në veprimtarinë e ish kreut të OSHEE.

Çela u largua në heshtje nga drejtimi i OSHEE në qershor të vitit 2023. Largimi u interpretua si një goditje ndaj Çelës, por në fakt ishte një tëheqje taktike për shpëtim, në kohën kur zullumi po këputej dhe SPAK po jepte shenjat e para të goditjes së korrupsionit në nivele të larta.

Abuzimet e Ardian Çelës në krye të OSHEE janë të frikshme, të larmishme dhe me pasoja të rënda në buxhetin e shtetit.

Disa nga aferat në OSHEE me protagonist Ardian Çelën, nën protektoratin e Damian Gjiknurit, janë dokumentuar nga Kontrolli i Lartë i Shtetit përmes disa raporteve voluminoze.

Një pjesë e parave të korrupsionit i kanë investuar në pasuri të palujtshme, kamufluar në emër të njerëzve të afërt dhe disa oligarkëve.

Teksa Gjiknurin po e mban me gajret një ministër se e ka nën kontroll hallin e tij në SPAK, Ardian Çela ka krijuar një kompani për shitje energjie tek operatorët e mëdhenj, për të cilën do flasim në vijim me letra.