Në fillim të këtij viti Vangjel Tavo deklaroi se nuk kishte asnjë dëshirë për t’u angazhuar në politikë.
Pas publikimit të shkrimit në gazetën greke “Kathimerini”, ku emri i tij përmendej si i përzgjedhur nga Edi Rama për të drejtuar përkohësisht Himarën derisa të merrte drejtim çështja “Beleri”, Vangjel Tavo pati reaguar për News 24.
“Nuk ka asnjë të vërtetë në lajmet greke. Nuk kam asnjë dëshirë të angazhohem në politikë”, ishte shprehur Tavo më 6 janar.
Dy muaj më vonë befas ish-deputetit të LSI i rikthehet dëshira për t’u marrë me politikë. Qeveria sot e emëroi në postin e prefektit të Vlorës.
Dyshimet janë se mos ky emërim është për një plan më të gjerë, ai që pati shkruar “Kathimerini” më herët, se Vangjel Tavo mund të katapultohet për të drejtuar Bashkinë e Himarës qoftë dhe përkohësisht.
Posti i prefektit natyrisht që është politik, pasi është përfaqësuesi i kryeministrit në qeverinë loakle.
Rikthimi i Vangjel Tavos nuk duhet parë vetëm i lidhur me postin e prefektit të Vlorës dhe as me një drejtim të përkohshëm të Himarës prej tij sa të kapërcehet ngërçi me Athinën. Nuk është çudi që ai të jetë edhe kandidati i PS për Bashkinë Himarë kur zgjedhjet të ribëhen nëse Gjykata e Apelit dënon përfundimisht Fredi Belerin.
Vangjel Tavo nuk është në Vlorë as se ishte pa punë as se ka ende shumë për të dhënë nga vetja në shërbim të Shqipërisë pas çerek shekulli në politikë.
Plani i tij B mund të jenë edhe zgjedhjet e vitit 2025. Socialistët e nxorrën nga politika në prill 2021 në Gjirokastër, socialistët mund ta rikthejnë sërish në Kuvend 4 vite më vonë. Çështja është do të jetë deputet i qarkut Vlorë apo qarkut Gjirokastër? Të presim!