Aleksandar Gjorçevska, babai i adoleshentes së vrarë Vanja, ndodhet në paraburgim, pasi dyshohet se ka marrë pjesë në rrëmbimin e vajzës së tij, që rezultoi në vrasjen e saj.

Babai i Vanja Gjorçevska, siç dyshohet, ka dashur t’i zhvasë para nënës së saj dhe janë marrëdhëniet familjare ato që zbulojnë motivin e lëvizjeve monstruoze të Aleksandrit.

Prokurori maqedonas, Gavril Bubevski, deklaroi se ka informacione se nëna e viktimës së fundmi ka shitur shtëpinë, pra ky ka qenë edhe motivi i rrëmbimit të vajzës.

Ai ka thënë se babai i vajzës ka qenë në kontakt me të dyshuarin kryesor që është arrestuar mbrëmë (5 Dhjetor), të cilit i ka treguar për këtë, si dhe se kur do të largohet vajza nga shtëpia.

Ministri i Punëve të Brendshme të Maqedonisë së Veriut, Oliver Spasovski, tha se ky është një krim i paprecedentë, një rast i izoluar, i kryer nga kriminelë monstra të cilët kanë dashur të përfitojnë materialisht, të vetëdijshëm se nëna e ka shitur banesën para pak kohësh.