Ardhja e festave të fundvitit është një arsye e mirë për të shpërdoruar fondet publike. Gjoja për të dekoruar qytetet e tyre, bashkitë përkatëse realizojnë tendera në shifra të fryra për të realizuar dekoret.
Ndonëse në parim shpenzimet për dekorin e qytetit duhet normalisht të realizohen nga vete bashkitë, në Shqipëri ndodh që organizohet tender që dekorin ta bëjë një firmë private. Deri këtu nuk ka ndonjë problem madhor, nëse procedura është e rregullt.
Por në rastin konkret kemi të bëjmë me një abuzim të vërtetë. Bëhet fjalë për një tender të organizuar nga Bashkia Pogradec e Ilir Xhakollit. Procedura ka si objekt “Dekor për fundvit”, me një fond limit prej 10,000,000 lekë të reja pa TVSH ose rreth 120 milionë lekë të vjetra me TVSH.
Po ku qëndron abuzimi? Duke hulumtuar dokumentat e këtij tenderi, vihet re se ka marrë pjesë vetëm fituesi. Pra jemi në kushtet e mungesës së konkurrencës. Jo vetëm kaq, por vlera fituese rezulton të jetë thuajse sa 100% e fondit limit.
