Prokuroria e Posaçme ka nisur hetim pasuror dhe jo vetëm, për afro 40 persona, shumica familjarë të të arrestuarve në kuadër të aksionit të pak ditëve më parë, ku ra në pranga Erzen Breçani.

SPAK zbuloi se janë trafikuar tonelata kokainë nga Ervin Mata dhe djali i Erzen Breçanit, teksa në biseda dalin dhe emra të tjerë. Po ashtu, kanë dalë fakte se si i ati i Ervin Matës po ndërton një kullë te ish-ekspozita që dyshohet me para droge.

Për këtë arsye SPAK është vënë në lëvizje dhe mësohet se ka futur në skaner gjithë familajen e Ervin Matës. Mësohet se do të verifikohen i ati i tij Luan Mata dhe e ëma Merita Mata. Po ashtu në skaner është futur dhe tezja e tij, Emis Mata. Emër i njohur padyshim është ai i Elvana Gjatës, të cilët kanë qenë prej vitesh në një lidhje. Gjata u përmend dy herë në komunikime, ku duket se përdorej për transferimin e parave.