TIRANË- Pasi kishin dështuar 1 ditë më parë me ngarkesën prej 446 kg kokainë që u kap në Holandë, grupi kriminal i trafikimit të drogës nga Amerika Latine nis planin për nisjen e një sasie prej 69 kg, kësaj here jo nga Ekuadori, por nga Brazili.

Por, edhe kësaj here rezultati do të ishte dështimi, lënda narkotike u kap pa u nisur. Droga është kapur më datë 18.02.2021 në portin detar të Santos. Kokaina ishte fshehur në motorin frigoriferik të një kontenieri, i cili transportonte fuçi me lëng limoni të ngrirë të koncentruar, me destinacion Portin e Valencias, në Spanjë.

Vetë grupi e kishte të qartë se për të ngarkuar drogën dhe për ta kaluar nga portet e Barzilit është shumë më e vështirë dhe në fakt ashtu u rezultoi, pasi porosia prej 69 kg kokainë u kap nga autoritetet. Në përgjimet e Sky ECC, Ismail Zeneli, i cili ishte porositësi dhe financuesit, i thotë personit *D****P* (i paidentifikuar) se nuk duhet të hapet shumë dhe të këtë kujdes në Brazil. Ata diskutojnë për mënyrën se si do ta fshehin drogën nëpër kontejner pasi kishin frikë se do kapej.