Emisioni në “Shënjestër” nga Klodiana Lala në News 24, ka zbardhur dosjen e plotë hetimore për grupin e narkotrafikut nga Amerika Latine në drejtim të Evropës, goditur së fundmi nga SPAK. Në dosjen hetimore zbardhen përgjimet midis ish-zyrtarit të policisë Erzen Breçanit dhe të biri, i cili ndodhet në Amerikën Latine, ndërsa i shpreh edhe dyshime për Ervin Matën, kunatin e djalit të tij.

PJESA E DYTË

Por cilat janë zbulimet e SPAK, lidhur mbi veprimtarinë kriminale të Ervin Matës, në trafikun ndërkombëtar të lëndëve narkotike, nga Amerika e Jugut në Evropë. Mata që ishte edhe njëri prej personazheve kryesorë të përfshirë në masakrën e Ish-Bllokut, më 4 Tetor 2018? Emri i të cilit del në transportin e 250 kg kokainë, të cilat po vinin me linjë ajrore, nga Brazili në aeroportin e Frankfurtit në Gjermani, në shtator të vitit 2020.

“Për sa i përket aktivitetit të personit nën hetim Ervin Mata: Në Shtator 2020 ky shtetas, bashkëbisedon në gjuhë të huaj në një grup chat-i. Nga ku dyshohet se në bashkëpunim me përdorues të tjerë Sky EÇ, kanë trafikuar një sasi prej 250 kg lëndë narkotike kokainë nga Brazili për në aeroportin e Frankfurt am Main-Gjermani”.