Një vogëlushe e braktisur në një qese plehrash u shpëtua nga një qen endacak. Historia e pabesueshme vjen nga kryeqyteti Tripoli i Libise, ku një kalimtar u tërhoq nga të qarat që vinin nga thesi që kafsha mbante butësisht në gojë dhe bëri zbulimin më të jashtëzakonshëm të jetës së tij.

Brenda çantës ishte një vajzë e gjallë. Ajo u dërgua me urgjencë në spitalin qeveritar në Tripoli për të marrë trajtimin e nevojshëm.

Pamjet në internet tregojnë vogëlushen me mavijosje të kuqe në fytyrë dhe trup, por fatmirësisht ajo tani është në gjendje të qëndrueshme shëndetësore.

“Një grua e panjohur e futi vajzën e vogël në një çantë, ”të zezë si zemra e saj”, pranë komunës së Tripolit ndërsa vogëlushja u shpëtua nga një qenush, shkruan gazeta dixhitale Safir Al Shamal.

“Është e pamundur të dihet nëse ‘gruaja e keqe’ që hodhi fëmijën kishte synuar ta hidhte në atë zonë që qentë ta përfundonin dhe t’i hanë kufomën, por në të gjitha rastet qeni që e tërhoqi zvarrë ishte më human përballë brutalitetit dhe kriminalitetit të kujtdo që e hodhi, pavarësisht nga arsyet dhe shkaqet”, shkruan shqiptari.net.

Gjesti i paimagjinueshëm pothuajse ‘njerëzor’ i qenit ka prekur zemrat e shumë njerëzve dhe shumë prej tyre kanë shprehur gatishmërinë për të birësuar fëmijën për t’i garantuar asaj një të ardhme më të mirë.

Episodi gjithashtu ndezi reflektime se sa e padrejtë është të konsiderosh qentë si kafshë jo të besueshme, duke demonstruar se ata zotërojnë një humanizëm, mirësi dhe inteligjencë që mund të tejkalojë atë të disa njerëzve. /atsh/