Kryeministri Edi Rama ka mohuar akuzat se ai kontrollon SPAK apo se Prokuroria Speciale vepron me urdhër të tij. Rama nuk ka kursyer ironinë në drejtim të Sali Berishës dhe mbështetësve të tij, të cilët e quajnë SPAK-un, SKAP.

“Thonë që s’ka drejtësi, por ka një SKAP që po e kap”, tha Rama, ndërsa u shpreh se çfarë kemi parë në periudhën e fundit është vetëm fillimi i fundit.

“Tani është edhe SPAK. Çfarë keni parë në periudhën e fundit me arrestime figurash të profilit të larta është vetëm fillimi i fundit. Që do të thotë ka filluar fundi i pozicionit të privilegjuar të krimit të organizuar në zona të caktuara të Shqipërisë. Do të jetë shumë e afërt koha kur të gjitha këto vatra do shuhen. Këtë luftë që e kemi filluar do ta fitojë shteti dhe do ta fitojë pa kthim. Sipas meje këtu ka dy pozicione të dallueshme në mexhlisin e debatit publik. Njëri është drejtësinë e re e solli Amerika, tjetri pozicion është s’ka drejtësi të re por ka një skap që po na kap se e ka kapur Edi Rama. Të dyja këto janë të pavërteta”, tha Rama.