Pas 14 muajsh hetime prokuroria ka mbyllur hetimin për vrasjen e Martin Çeços, dhe pretendon se 26-vjeçarin e mbytën dhe e hodhën në rezervuar për të inskenuar vetë vrasjen.

Sipas akuzës i riu u nxor nga banesa nga vajza me të cilën kërkonte të kishte lidhje. Ndërsa i dashuri i saj dhe dy të tjerë e vranë.

Sipas prokurorisë, ngjarja ka ndodhur për shkaqe xhelozie pasi i riu kërkonte të kishte një lidhje me vajzën 19-vjeçare Tina Pajollari banore e fshatit Marjan.

Por për të interesohej Valter Mollaj, i cili duke deklaruar se e kishte të dashur i kërkonte viktimës t’i qëndronte larg.

Akuzës i janë dashur 14 muaj kohë për të përfunduar dosjen, duke kërkuar dënimin e 4 personave, Pajollarin, Valter Mollajn, djalin e xhaxhait të këtij të fundit Edlirin dhe çobanin e lopëve të Valterit, Bleti Angjo, të cilët janë aktualisht në masën e arrestit dhe ndaj tyre rëndon akuza e “Vrasjes me paramendim” kryer në bashkëpunim.

Autorët e sipërpërmendur ditën e ngjarjes kanë shkuar me makinë fuoristradë në fshatin Kolanec prej ku kanë marrë Martinin. Nga banesa e ka nxjerrë vetë vajza për tu kapur më pas nga tre burrat.

Sipas dosjes hetimore Litarin ia kanë vënë duke i dalë nga pas e më pas e kanë hedhur në ujë për të fshehur gjurmët e për të bërë skenarin më të besueshëm dy shapkat që mbante veshur ja shpërndanë rreth bregut ku një prej tyre u gjet nga familjarët.

Për këtë shkak u dyshua fillimisht vetëvrasja. Por shenjat rreth qafës së të riut të konstatuara nga mjekësia ligjore ngritën dyshime për vrasje.