Një aksident i rëndë ka ndodhur gjatë orëve të para të mëngjesit të sotëm në aksin Sarandë – Qafë Botë, në afërsi në Konispolit.

Sipas burimeve paraprake, makina ka dalë nga rruga dhe për pasojë ka humbur jetën Adriana Prendi, 35-vjeçe dhe janë plagosur dy të tjerë të cilët janë dërguar në spital, një prej tyre bashkëshorti i viktimës dhe njëherësh shoferi i automjetit, Gëzim Prendi.

Të aksidentuarit po ktheheshin nga dasma, ku viktima kishte martuar vëllanë dhe pas dasmës ishin nisur për në Greqi, ku edhe jetonin.

Njoftimi i policisë:

Rreth orës, 05:50, të mëngjesit të sotëm në aksin rrugor Krane-Qafëbotë, në dalje të Konispolit, automjeti tip “Volkswagen”, me drejtues shtetasin Gëzim Prendi, 43 vjeç, ka dalë nga rruga, dhe për pasojë ka humbur jetën pasagjerja, shtetasja Adriana Prendi , 35 vjeçe, bashkëshortja e 43-vjeçarit, banuese në Konispol.

Si dhe ka pësuar dëmtime pasagjeri tjetër në këtë automjet, shtetasi, 37 vjeç, i cili ndodhet jashtë rrezikut për jetën.

Grupi hetimor ka shkuar menjëherë në vëndngjarje dhe po punon për sqarimin dhe dokumentimin e rrethanave dhe shkakut të aksidentit, ku paraprakisht dyshohet se drejtuesi i automjetit ka humbur kontrollin mbi drejtimin e automjetit dhe për pasojë automjeti ka dalë nga rruga./abcnews.al