Banka Qendrore e Kosovës ka publikuar bilancin e pagesave për muajin qershor. Ky bilanc, sipas BQK-së, u karakterizua nga një deficit i llogarisë rrjedhëse i cili shënoi një vlerë prej 502.7 milionë euro e që krahasuar me periudhën e njëjtë të vitit kaluar është më i ulët për 19% (623.7 milionë euro ishte deficiti deri në qershor 2022).

Kurse, shërbimet deri në qershor 2023 kanë shënuar bilanc pozitiv në vlerë 553.2 milionë euro, që paraqet rritje prej 36% krahasuar me periudhën e njëjtë të vitit 2022 (407.8 milionë euro). Rritja më e madhe ka qenë te shërbimet e udhëtimit, e që në këto shërbime më së shumti ka shpenzuar diaspora.

“Vetëm gjatë muajit qershor në Kosovë shërbimet e udhëtimit kanë arritur vlerën 141.3 milionë euro, vitin e kaluar në këtë periudhë kanë qenë 132.3 (7 % më të ulëta se këtë vit). Rreth 90% e shpenzimeve të udhëtimit në Kosovë, përkatësisht 126.6 milionë euro janë shpenzimet e diasporës. Krahasuar me periudhën e njëjtë vitin e kaluar, diaspora këtë vit ka shpenzuar rreth 15% më shumë”, ka thënë BQK-ja.

Kurse shpenzimet e udhëtimit të kosovarëve jashtë, gjatë muajit qershor kanë arritur vlerën 58.9 milionë euro që paraqet rritje prej 18% krahasuar me periudhën e njëjtë të vitit 2022, prej të cilave rreth 46% janë shpenzimet në Shqipëri.

E, edhe llogaria e të ardhurave dytësore shënoi rritje për 12% sipas BQK-së, e cila thotë se transferet rrjedhëse të sektorit qeveritar dhe të sektorëve tjera, si remitancat dhe transferet ku përfshihen donacionet, pensionet, mbeten kontribuesi kryesor në zbutjen e deficitit të llogarisë rrjedhëse.

Remitancat shënuan 635.1 milionë euro deri në qershor, që paraqet rritje prej 14% krahasuar me periudhën e njëjtë të vitit kaluar.

Investimet direkte arritën vlerën 374.2 milion euro e që paraqet rritje prej 14% krahasuar me periudhën e njëjtë të vitit kaluar (327.3 milionë euro deri në qershor 2022).

“Investimet tjera (investimet në depozita, kredi dhe në kredi tregtare) deri në qershor 2023 kanë shënuar vlerë negative (135.9) milionë euro dhe cila i atribuohet kryesisht rritjes së borxhit të jashtëm në Kosovë”, thuhet në të dhënat e BQK-së.

Bilanci tregtar në mallra në kuadër të BP, deri në qershor 2023, kishte deficit në vlerë prej 2.1 miliardë euro, “që është deficit më i madh tregtar krahasuar me periudhën e njëjtë të vitit paraprak”, theksoi Banka më tej.