Xhuliano Bitri, vëllai 18-vjeçar i Klajdi Bitrit të riut shqiptar që u vra me shtizë pasditen e së dielës në Sirolo të Italisë, kërkon drejtësi.

Në një intervistë për mediat italiane, Xhuliano thotë se vëllai i tij punonte në port dhe ishte i integruar mirë në Ankona, qytetit ku jetonte dhe ku u vra në përpjekje për të mbrojtur një mik italian, nga një shtetas algjerian.

“Unë dua drejtësi. E pashë vëllanë të më vdiste vdiste para meje, të vrarë me indiferencë totale, pa e kuptuar as pse. Pa pasur kohë për të kuptuar se ai po vdiste. E pashë të zbehej gjithnjë e më shumë, krejt papritur, dhe nuk më përgjigjej më sepse kishte vdekur. I vrarë”, thotë Xhuliano.

Xhuliano tregon se ishin në makinë kur pa sherrin që po ndodhte në mes të rrugës! Klajdi, tregoi ai më tej, i kërkoi algjerianit që të largohej dhe gjithçka u duk sikur u qetësua, por algjeriani u kthyes sërish me një shtizë në dorë dhe qëlloi.

“Isha me vëllanë tim dhe një person tjetër, po shkonim në det në Sirolo. Ishim pak mbrapa dhe, kur mbërritëm, pamë Danilon (mikun italian) duke u rrahur nga algjeriani në mes të rrugës. Vëllai im kishte shumë respekt për Danilon, pasi e mori për të punuar në kuzhinën e restorantit të tij dhe vëllai im mundi të kursente para e të më merrte dhe mua me vete këtu në Itali.

Vëllai hyri për të ndarë sherrin, por kur u duk se gjithçka ishte qetësuar, algjeriani e godit edhe atë me shtizë. Ai e qëlloi me dashje. Pasi i nguli shtizën vëllait tim në gjoks, u largua. Prindërit tanë janë ende në Shqipëri. Ata nuk mund të vijnë as në Itali për të parë djalin e tyre. Tani, jam unë që ndihem i detyruar të zgjidh të gjitha dokumentet e nevojshme për ta dërguar trupin në shtëpi“, tha ai me lot në sy, teksa përpiqet ta rikthejë trupin e vëllai në Shqipëri për t’i dhënë lamtumirën e fundit.

Autori i krimit algjeriani Fatah Melloul u arrestua 4 orë pas ngjarjes, ndërsa policia arriti ti sekuestronte edhe armën me të cilën i preu jetën në mes Klajdit 23 vjeçar. Mediat italiane e përshkruan të riun shqiptar si një “shembull i përsosur i integrimit”.

Ai punonte në port prej shumë vitesh dhe ishte i integruar mirë në realitetin e Ankonës, qytetit ku jetonte. Ai u vra në përpjekje për të mbrojtur një mik italian, i cili ishte sulmuar nga i akuzuari dhe më pas arrestuar për krimin.