Gjykata e Lartë ka rrëzuar rekursin e paraqitur nga kryebashkiaku i Tiranës, Erion Veliaj, lidhur me një çështje që është në hetim nga SPAK. Vendimi lidhet me kërkesën e tij për të shpallur të pavlefshme disa veprime hetimore, e cila ishte refuzuar më herët edhe nga Apeli i Posaçëm.

Sipas burimeve, vendimi është marrë në dhomë këshillimi nga kolegji penal i përbërë nga gjyqtarët Albana Boksi, Sokol Binaj dhe Genti Shala. Me këtë vendim, gjykata ka lënë në fuqi qëndrimin e mëparshëm të Apelit.

Çështja ndaj Veliajt është pjesë e një hetimi më të gjerë nga Prokuroria e Posaçme (SPAK), i cili ka tërhequr vëmendje të madhe publike për shkak të funksionit të tij si kryebashkiak i kryeqytetit.

Ndaj tij rëndojnë disa akuza të rënda, përfshirë korrupsion pasiv dhe aktiv të zyrtarëve të lartë, pastrim parash, si dhe fshehje apo deklarim të rremë të pasurisë dhe interesave privatë, sipas detyrimeve ligjore për zyrtarët publikë.

Hetimet vijojnë dhe procesi mbetet në zhvillim, ndërsa vendimet e gjykatave deri tani kanë konfirmuar vazhdimësinë e procedurave hetimore të SPAK.