Një zyrtar policor ka përfunduar në pranga pas një operacioni të Inspektoratit Policor të Kosovës, i zhvilluar në bashkëpunim me Prokurorinë Themelore në Ferizaj. Arrestimi është bërë më 16 prill gjatë një operacioni hetimor me masa të fshehta, ku përfshihej edhe simulimi i korrupsionit, dhe i dyshuari është kapur në flagrancë.

Sipas informatave, bëhet fjalë për Edison Limanin, zyrtar policor në Stacionin Policor të Shtërpcës, nën Drejtorinë Rajonale në Ferizaj. Ai dyshohet se ka pranuar 2,000 euro si pjesë e një shume të përgjithshme, në lidhje me veprën penale “organizim i skemave piramidale dhe bixhozit të paligjshëm”.

Operacioni është zhvilluar nga Inspektorati Policor i Kosovës (IPK), me autorizim të Prokurorisë Themelore në Ferizaj. Me vendim të prokurorit të shtetit, i dyshuari është dërguar në ndalim për 48 orë, ndërkohë që hetimet për zbardhjen e plotë të rrethanave të rastit vazhdojnë.

Shënim: Personat e përmendur në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata, duke respektuar parimin e të drejtave të njeriut dhe presumptionin e pafajësisë.