Ish-Kreu i Shtetit dhe Presidenti i Partisë së Lirisë, Ilir Meta, ka publikuar një deklaratë audio nga qelia ku pretendon se po i mohohen të drejtat dhe se disa prej tyre po shkelen ose tjetërsohen në mënyrë abuzive. Ai u vizitua nga Zylyftar Bregu, përfaqësues i Komitetit Shqiptar të Helsinkit, i cili u njoh nga afër me kushtet dhe shqetësimet e tij në IEVP “Jordan Misja”.

Meta falënderoi përfaqësuesin për ndërhyrjen pas konstatimit të mungesës së ndriçimit në tualetin e qelisë, problem që sipas tij ekzistonte prej kohësh. Ai e cilësoi këtë si një neglizhencë të vogël, por shtoi se ka edhe shqetësime të tjera, si dëmtimi i qëllimshëm i bidonave të ujit për të penguar ushtrimet fizike, në kushtet kur mungon një palestër në burg.

Një nga çështjet kryesore që ai ngriti ishte pretendimi i drejtuesve të burgut se ai kryen ajrosje si të gjithë të paraburgosurit. Meta e kundërshton këtë, duke thënë se del vetëm një herë në ditë dhe kërkon ballafaqim me përgjegjësin e policisë që, sipas tij, ka dhënë informacion të rremë. Ai shton gjithashtu se nuk i është dhënë ende vendimi zyrtar për masat disiplinore të marra ndaj tij.

Në letrën drejtuar Erida Skëndaj, ai ngre shqetësime edhe për kufizimin e komunikimit me mediat dhe bashkëpunëtorët politikë, si dhe për pengesat në takime dhe kontakte telefonike. Meta thekson se nuk kërkon privilegje, por trajtim të barabartë dhe respektim të të drejtave të garantuara nga ligji dhe konventat ndërkombëtare.