Me një paketë ndërhyrjesh emergjente që synojnë frenimin e presioneve mbi familjet dhe bizneset, qeveria gjermane është përpjekur t’i përgjigjet pasojave ekonomike të luftës SHBA-Izrael me Iranin. Kjo vjen në një kohë kur ekonomia më e madhe e Evropës ende po përpiqet të rimëkëmbet pas dy vitesh të vështira.

Siç raporton “Reuters”, vendimet përfundimtare u njoftuan të hënën (13 prill), pas negociatave të mbyllura gjatë fundjavës midis koalicionit konservator të Kancelarit Friedrich Merz dhe partnerëve të tij socialdemokratë në qeveri. Vetë Merz pranoi se kostoja e këtij konflikti nuk do të jetë e përkohshme.

Ai deklaroi në Berlin se pasojat e luftës do të ndihen për një kohë të gjatë, edhe pasi ajo të ketë përfunduar. Sipas tij, qeveria synon të bëjë gjithçka të mundur për të ruajtur dhe përmirësuar konkurrueshmërinë e ekonomisë gjermane, si dhe për të lehtësuar situatën për familjet.

Ndërhyrja e parë dhe më e menjëhershme është ulja e përkohshme e taksës së karburantit me 17 cent për litër për benzinën dhe naftën, për një periudhë dy mujore. Në të njëjtën kohë, kompanive u jepet mundësia të paguajnë një bonus pa taksa deri në 1,000 euro për punonjësit gjatë vitit 2026, si një formë lehtësimi financiar.

Paketa përfshin gjithashtu masa më afatgjata, si lehtësime tatimore për të ardhurat e ulëta dhe të mesme deri në vitin 2027 dhe një reformë të sistemit të sigurimeve shëndetësore. Qeveria synon gjithashtu të ndikojë në politikat evropiane për industrinë e automobilave, duke kërkuar ndryshime në objektivat e emetimeve për prodhuesit.