Mandatari i ardhshëm hungarez, Peter Magyar, paralajmëroi deportimin e ish-kryeministrit të Maqedonisë së Veriut, Nikola Gruevski. Gjatë një konference për shtyp, ai u pyet nga gazetarët edhe për dy ish-ministra polakë të kërkuar për korrupsion, të cilët kanë gjetur strehim dhe azil në Hungari.

Magyar deklaroi se as ata dhe as Gruevski nuk do të qëndrojnë gjatë në Hungari, duke theksuar se vendi nuk duhet të shndërrohet në strehë për persona të kërkuar ndërkombëtarisht. Ai u shpreh se kjo qasje do të vlejë për të gjitha rastet e ngjashme.

“Hungaria nuk do të bëhet deponi për kriminelë të kërkuar ndërkombëtar. Kjo vlen jo vetëm për ish-ministrat polakë, por edhe për Nikola Gruevskin,” deklaroi ai, duke shtuar se bëhet fjalë për një ish-kryeministër që kërkohet nga drejtësia.

Ish-kryeministri Gruevski ndodhet në arrati që nga viti 2018, pas dënimit me dy vite burg për rastin “Tank”. Ai mori azil në Hungari duke pretenduar se ishte i përndjekur politikisht nga qeveria e atëhershme e udhëhequr nga Zoran Zaev, ndërsa në vitin 2019 Hungaria refuzoi kërkesën për ekstradimin e tij.