“Allahu ekber, Allahu ekber… Esh-hedu en la ilahe il-lall-llah…”. Kjo thirrje po dëgjohej në fshatin Mlikë të Gorës në Dragash edhe para ardhjes së ushtrisë osmane këtë javë. Sipas historianëve, ajo është dëgjuar në këtë fshat që në kohë shumë më të hershme, madje edhe para ardhjes së osmanëve në Ballkan.

Në këtë zonë malore, thirrja për faljen e namazit bëhej nga një xhami që besohet të jetë ndër faltoret më të hershme islame në Ballkan. Sipas të dhënave historike, themelet e saj mund të jenë vendosur nga familje të ardhura nga Halepi i Sirisë, të cilat sollën me vete traditën shpirtërore dhe ndikuan edhe te banorët vendas.

Disa elemente historike sugjerojnë se kjo xhami është ndërtuar para ardhjes së osmanëve, duke dëshmuar se Islami në këtë zonë është praktikuar më herët. Historiani Parim Kosova ka theksuar se mbishkrimi i xhamisë tregon praninë e Islamit që në shekullin XIII, pra para pushtimit të Prizrenit nga osmanët në vitin 1459.

Sipas dokumenteve dhe hulumtimeve, disa familje nga Halepi janë vendosur në Mlikë mes viteve 1205 dhe 1291 dhe kanë ndërtuar xhaminë. Një vërtetim i vitit 1995 nga autoritetet fetare të Halepit pohon se xhamia është pronë e këtyre familjeve dhe nuk është ndërtim osman.