Punimet që po zbatohen në pjesën e parë të autostradës Tiranë-Durrës, deri tek mbikalimi i Rinasit, pritet të përfundojnë brenda javës së parë të muajit maj, duke mundësuar hapjen e plotë të këtij segmenti për qarkullim.

Gjatë një inspektimi të zhvilluar këtë të enjte në këtë aks, Ministri i Infrastrukturës dhe Energjisë, Enea Karakaçi, u ndal te ecuria e punimeve dhe planet në vijim për këtë projekt, si dhe për disa projekte të tjera të ndërlidhura me të. Ai theksoi se ky segment do të jetë plotësisht funksional brenda afatit të parashikuar.

Sipas ministrit, aksi Tiranë-Durrës ka një rëndësi të veçantë për lidhjen e portit të Durrësit me Morinën, për komunikimin mes Veriut dhe hyrjes në Tiranë, si dhe për zhvillimin e turizmit. Ai nënvizoi gjithashtu se paralelisht po punohet edhe për projekte të tjera si Bypassi i Tiranës dhe segmenti Kashar-Lekaj.

Nga ana tjetër, u bë e ditur se puna do të vijojë për zgjerimin e pjesëve të tjera të autostradës dhe për procedurat përkatëse. Kreu i ARRSH-së përmendi edhe projektin e ardhshëm të quajtur “Arredimi Urban”, i cili synon përmirësimin e gjelbërimit, akustikës dhe ndriçimit, si dhe rikthimin në funksion të të gjitha mbikalimeve për këmbësorë, pasi aktualisht vetëm 2 nga 5 janë funksionale, ndërsa zgjerimi i autostradës kërkon përshtatjen e tyre.