Ish-zëdhënësi i NATO, Jamie Shea, ka deklaruar se dëshiron ta shohë Kosovën anëtare të NATO-s përpara se të largohet nga jeta. Ai vlerësoi se ndërhyrja e aleancës në vitin 1999 ishte e drejtë dhe e domosdoshme, pavarësisht sfidave dhe vështirësive që shoqëruan atë periudhë.

Duke folur në emisionin “Interaktiv” në KTV, Shea theksoi se arritja e konsensusit për ndërhyrjen nuk ishte e lehtë dhe se operacioni ushtarak ishte kompleks. Megjithatë, sipas tij, pas më shumë se dy dekadash, ndërhyrja konsiderohet si vendimi i duhur dhe i nevojshëm për situatën e asaj kohe.

Ai shtoi se NATO duhet të tregojë më shumë vizion dhe fleksibilitet sa i përket të ardhmes së Kosovës, duke theksuar se pengesat politike nuk duhet të ndalojnë avancimin e saj drejt integrimit euroatlantik. Sipas tij, mungesa e njohjes nga disa vende anëtare nuk duhet të jetë arsye për stagnim.

Në fund, Shea u shpreh optimist se Kosova do të bëhet pjesë e NATO-s dhe theksoi se nuk sheh arsye pse vendi të mos jetë të paktën anëtar i plotë i programit Partneriteti për Paqe, si një hap i rëndësishëm drejt anëtarësimit të plotë në aleancë.