Shtetet e Bashkuara nuk duhet të pakësojnë numrin e ushtarëve në Kosovë — kjo ishte thirrja e qartë dhe e drejtpërdrejtë e një grupi kongresmenësh dhe senatorësh, si republikanë ashtu edhe demokratë, drejtuar Sekretarit Amerikan të Shtetit, Marco Rubio, përmes një letre zyrtare. Ata shprehën shqetësim të thellë lidhur me raportimet se administrata e presidentit Donald Trump po shqyrton mundësinë e tërheqjes së një pjese të trupave nga misioni i KFOR-it.

Në letër theksohet se në një periudhë të brishtë politike dhe me rritje të ndikimeve dashakeqe në Ballkanin Perëndimor, çdo reduktim i parakohshëm i pranisë ushtarake amerikane mund të ketë pasoja serioze. Sipas tyre, një veprim i tillë rrezikon të destabilizojë jo vetëm Kosovën, por edhe rajonin më të gjerë, veçanërisht Bosnjë dhe Hercegovinën, duke cenuar interesat strategjike të sigurisë së Shteteve të Bashkuara.

Ligjvënësit amerikanë paralajmërojnë se ulja e numrit të trupave do të ndikonte negativisht edhe në dialogun ndërmjet Prishtinës dhe Beogradit, duke krijuar hapësirë për aktorë destabilizues që të rrisin ndikimin e tyre në rajon. Ata nënvizojnë se prania ushtarake amerikane është një faktor kyç për ruajtjen e stabilitetit dhe përparimin e proceseve politike në Ballkan.

Në veçanti, në letër përmendet roli i Rusisë, e cila sipas tyre ka bllokuar vazhdimisht njohjen ndërkombëtare të pavarësisë së Kosovës dhe vazhdon të ushtrojë ndikim malinj në rajon. Duke iu referuar të dhënave të inteligjencës, ligjvënësit theksojnë se nuk ka shenja të zvogëlimit të këtij ndikimi, ndaj kërkojnë që SHBA-të të mos reduktojnë praninë ushtarake dhe të mos krijojnë hapësirë shtesë për veprimtarinë ruse.