Kryeministri Edi Rama paralajmëroi se çmimet e pronave në Shqipëri do të dyfishohen pas anëtarësimit të vendit në Bashkimin Europian, duke e cilësuar këtë si një mundësi të artë investimi.
Gjatë konferencës “Shqipëria, Horizonti i Ri”, Rama bëri thirrje të hapur për të gjithë ata që disponojnë kapital, duke i ftuar të blejnë toka dhe apartamente në Shqipëri përpara se çmimet të arrijnë nivele më të larta.
Kryeministri vuri në dukje se sektori i pronave po ecën me hapa të shpejtë përpara dhe se ende ekziston hapësira për blerje me çmime të përballueshme, por kjo dritare mundësie nuk do të mbetet e hapur për kohë të gjatë.
Rama drejtoi gjithashtu një thirrje edhe ndaj ndërkombëtarëve, duke i nxitur të inkurajojnë pensionistët nga vendet e tyre që të kalojnë më shumë kohë në Shqipëri, duke vënë në dukje se sezoni turistik po zgjatet vazhdimisht.
