Sali Berisha reagoi ditën e sotme me një video-mesazh ndaj deklaratave të Edi Ramës, duke e akuzuar kryeministrin se po mbron me çdo kusht Belinda Ballukun. Sipas tij, Rama po përpiqet të mbyllë një çështje që, sipas Berishës, tashmë ka marrë përmasa të mëdha politike dhe publike.

Berisha deklaroi se “çështja Balluku është çështja Rama” dhe se ajo nuk mund të mbyllet pa largimin e tij nga pushteti. Ai theksoi se kjo çështje nuk mund të shuhet me vendime politike apo me mbështetje nga shumica parlamentare.

“E vërteta është se çështja Balluku nuk mbyllet kurrë dhe se çështja Balluku është vetëm çështja Rama dhe ajo mbyllet vetëm me largimin e Edi Ramës. Çështja Balluku është bërë një çështje ndërkombëtare dhe Edi Rama nuk mund ta mbyllë atë me një grusht hajdutësh në parlamentin e tij. Edi Rama vetë demaskoi veten në këtë çështje dhe ai dëshmoi se është autori i të gjitha veprave penale të Lubi Ballukut”, u shpreh Berisha.

Berisha kritikoi gjithashtu projektin për zhvendosjen e Portit të Durrësit drejt Porto Romanos, si dhe çmimin e lartë të naftës në Shqipëri. Ai e cilësoi këtë projekt si “mashtrimin më të madh të ditës”, duke pretenduar se porti i planifikuar në Porto Romano do të jetë shumë më i vogël se porti aktual i Durrësit dhe se synimi i vërtetë është vazhdimi i projektit që ai e quajti “Dubait të 1001 netëve”.