Qendra Spitalore Universitare “Nënë Tereza” në Tiranë u ka bërë thirrje pacientëve, familjarëve të tyre dhe çdo qytetari që të denoncojë rastet e korrupsionit në spital. Apeli vjen në një kohë kur çështja e ryshfetit në shërbimet shëndetësore është shpesh objekt debatit publik.

Përmes një video-njoftimi në rrjetet sociale, drejtoresha e këtij institucioni, Anxhela Paparizo, theksoi se vetëm përmes transparencës dhe raportimit të rasteve të dyshuara mund të ndërtohet një sistem shëndetësor më i drejtë dhe më cilësor për qytetarët.

Në reagimin e saj, Paparizo deklaroi se, nisur nga akuzat e hedhura publikisht për afera korruptive të stafit mjekësor, QSUT u bën thirrje pacientëve, familjarëve dhe çdo qytetari që, nëse përballen me situata të tilla, t’i denoncojnë ato pranë Koordinatorit të Antikorrupsionit në adresën elektronike: [koordinatori.ak@dpak.al](mailto:koordinatori.ak@dpak.al). Sipas saj, vetëm përmes transparencës dhe raportimit të rasteve mund të përmirësohet cilësia e shërbimit mjekësor.

Deklaratat e Paparizos vijnë pasi pak kohë më parë një tjetër deklaratë e saj u bë virale në rrjetet sociale, kur ajo tha se nuk kishte dijeni që në spitale t’u merreshin para pacientëve. Kjo deklaratë u përball me reagime të shumta, pasi ndër vite pacientët kanë raportuar vazhdimisht raste kur, sipas tyre, “po nuk pagove, nuk merr shërbim”.