Në kuadër të shënimit të Dita Ndërkombëtare e Gruas, Asambleja Parlamentare e NATO-s ka ftuar Presidenten e Kosovo, Vjosa Osmani, që të ndajë një mesazh të veçantë për gratë dhe vajzat në mbarë botën. Ftesa konsiderohet një vlerësim i rëndësishëm për rolin dhe angazhimin e saj në skenën ndërkombëtare.

Osmani është gjithashtu laureate e çmimit prestigjioz “Gratë për Paqe dhe Siguri 2025”, një vlerësim që jepet nga Asambleja Parlamentare e NATO-s për personalitetet që kontribuojnë në forcimin e rolit të grave në proceset e paqes, sigurisë dhe vendimmarrjes politike. Ky çmim shihet si një tjetër vlerësim ndërkombëtar për lidershipin e saj dhe për përfaqësimin e Kosovës në arenën globale.

Në mesazhin e saj, Vjosa Osmani theksoi rëndësinë e përfshirjes së grave në vendimmarrje dhe në ndërtimin e shoqërive më të forta dhe më të qëndrueshme. Ajo nënvizoi se përvoja në shumë vende të botës ka treguar se kur gratë janë pjesë aktive e proceseve politike dhe të sigurisë, shoqëritë bëhen më paqësore dhe më rezistente ndaj krizave.

Presidentja e Kosovës u bëri thirrje institucioneve dhe shoqërive që të vazhdojnë të investojnë në fuqizimin e grave dhe vajzave, duke theksuar se lidershipi i tyre është thelbësor për të ardhmen. Sipas saj, përfshirja e grave nuk duhet të shihet vetëm si çështje barazie, por edhe si një domosdoshmëri për zhvillim të qëndrueshëm dhe siguri globale. Ndërkohë, Asambleja Parlamentare e NATO-s theksoi se historia është e mbushur me gra që udhëheqin dhe frymëzojnë në ndërtimin e një bote më të sigurt, duke ftuar publikun të bashkohet në vlerësimin e rolit të tyre.