Familja e gjyqtarit Astrit Kalaja, i vrarë në Gjykatën e Apelit në Tirana, ka kërkuar që shteti ta shpallë atë “dëshmor të atdheut”. Në shkresat që disponon Top Channel, bashkëshortja e gjyqtarit, i cili kishte një karrierë 32-vjeçare në drejtësi, ka kërkuar hapjen e procedurave nga Ministria e Drejtësisë gjatë kohës kur ky institucion drejtohej nga Besfort Lamallari.

Në kërkesë theksohet se gjyqtari u vra në sallën e gjyqit gjatë shpalljes së vendimit në emër të Republikës. Sipas përshkrimit, autori ishte një nga palët në proces, i cili nxori armën dhe e qëlloi menjëherë pasi u shpall vendimi.

Familja këmbëngul se rendi dhe qetësia nuk sigurohen vetëm nga policia, por edhe nga institucionet e drejtësisë. Për këtë arsye ata po përgatiten t’i drejtohen edhe Komisionit Qendror të Statusit të Dëshmorit, një hap që mund të hapë rrugën edhe për një padi në gjykatën administrative.

Gjyqtari Kalaja u vra nga Elvis Shkëmbi, xhaxhai i të cilit ishte palë në një proces disa-vjeçar të nisur në Shkodër. Të dy të dyshuarit ndodhen në burg dhe hetimet nuk janë mbyllur ende, pasi prokuroria e kryeqytetit është në pritje të ekspertizës së telefonit për të kuptuar nëse ka pasur bashkëpunim mes tyre për kryerjen e krimit. Ngjarja riktheu në vëmendje problemin e sigurisë në gjykata dhe prokurori, ndërsa edhe më parë janë raportuar raste kërcënimesh ndaj trupave gjyqësore gjatë shpalljes së vendimeve.