Meteorologu i njohur, Hakil Osmani, ka bërë një parashikim për muajin mars, duke theksuar se ai do të karakterizohet nga ndryshueshmëri tipike pranverore dhe temperatura relativisht të larta.

Sipas tij, ndryshe nga disa vite të tjera, marsi i këtij viti pritet të sjellë temperatura tipike pranverore, madje në disa ditë ato do të ngjiten deri në 22 gradë Celsius. Ai thekson se 15 ditët e para të muajit do të dominohen nga mot i qëndrueshëm, megjithëse nuk do të mungojnë alternimet me vranësira të shpeshta dhe reshje të pakta shiu në zona të caktuara.

“Kjo javë pritet të jetë tipike pranverore, pasi temperaturat do të jenë më të larta krahasuar me mesataren e muajit mars, me maksimume që do të luhaten nga 20 deri në 22 gradë Celsius. Rritja e temperaturave do të ndihet jo vetëm gjatë orëve të mesditës, por edhe në mëngjes.

Dita e premte dhe fundjava do të karakterizohen nga mot i qëndrueshëm dhe intervale të gjata me diell. Pjesa e parë e marsit do të dominohet nga kthjellime dhe temperatura të larta, ndërsa në pjesën e dytë të muajit pritet shtim i vranësirave dhe reshje shiu”, u shpreh ai.