Kryetari i Komunës së Prishtinës, Përparim Rama, në një intervistë për RTV21 ka njoftuar se komuna po shqyrton masa të reja për menaxhimin e trafikut dhe automjeteve që hyjnë në qytet.
Një nga idiet e propozuara është vendosja e një tarife prej 1 € për çdo makinë që hyn në Prishtinë. Kjo do të vlejë sidomos për automjetet që nuk janë të regjistruara në Prishtinë, pra vijnë nga qytetet apo vendet tjera.
Sipas Ramës, kjo taksë do të ndihmojë në financimin e projekteve të mëdha të trafikut, siç është ndërtimi i unazës së brendshme të qytetit.
Ai ka përmendur shembullin që rreth 140 000 makina hyjnë në Prishtinë gjatë ditës. Nëse secila paguan nga 1 €, kjo do të sjellë një shumë të konsiderueshme që mund të përdoret për investime në infrastrukturë dhe përmirësimin e qarkullimit.
Për momentin, propozimi është ende në fazë analizimi dhe nuk është miratuar zyrtarisht nga autoritetet komunale apo nga Asambleja e Prishtinës.
