Ironia dhe batutat “therëse” janë pjesë e retorikës së kryeministrit Edi Rama thuajse në çdo komunikim publik. Nuk munguan as në konferencën e fundit për këtë vit, që shënon dhe marrjen e mandatit të tretë të Partisë Socialiste.

Në përgjigje të kritikave e aludimeve të shumta, sidomos pasi zëvendësja e tij, Belinda Balluku, u mor e pandehur nga SPAK, Rama foli për Tunelin e Llogarasë.

“Hekur në Tunelin e Llogarasë nuk ka, është përdorur bar i thatë, e keni parasysh?! Ngaqë u desh vjedhur shumë, u vu bar i thatë, madje, madje ka një krim që është bërë se është marrë shumë zhavorr dhe bar, zhavorr, rërë dhe u bë një strukturë dhe ata turqit se janë të poshtër shumë, pretendojnë se është më i fortë se hekuri.

Sa të dalin këto, tuneli është aty, shëndosh e mirë dhe e përdorin të gjithë…

Inshallah i gjeni, ne ndërkohë do vazhdojmë të bëjmë tunele, akset dhe do ecim shumë me projektet e hekurudhave. Kështu i kemi ndarë detyrat, ju aty tenxheret fort!”, ishte “fabula” që i thuri gjithë diskutimeve që janë krijuar për një projekt të finalizuar në 2025-ën dhe që për të “përbën një super sukses”.

Ironitë nuk i kurseu as për opozitën, për të cilën muajt e fundit shprehet më rrallë dhe vetëm atëherë kur e pyesin gazetarët.

“Demokratikja ndjesë pastë!”, apo “Unë dhe PS në zyrë, ata poshtë penxheres, në rrugë” – ishin dy fjalitë më kyçe që tha referuar Partisë Demokratike, e cila ka nisur një tur foltoresh dhe proteston çdo të hënë para godinës së Këshillit të Ministrave.

SPAK-u, që e thekson shpesh është “institucion i krijuar falë vullnetit të kësaj force qeverisëse“, nuk e la jashtë deklaratave të tij me humor.

“Meqë fjalën dhe kryefjalën, kallëzuesin e kundrinorin e keni SPAK, pikën e parë e keni SPAK-un, do përgjigjem natyrisht.“