Ish-deputeti Bekim Haxhiu deklaroi se PDK, me Bedri Hamzën si kandidat për kryeministër, pritet të dalë partia e parë në zgjedhjet e 28 dhjetorit. Ai tha se rezultati i zgjedhjeve lokale të 12 tetorit, ku PDK siguroi numrin më të madh të asamblistëve, dëshmon rritjen e fuqisë së partisë.
Haxhiu konfirmoi se do të rikandidojë për deputet me kërkesën e qytetarëve, duke theksuar se “në legjislaturën e kaluar më shumë i kam munguar unë Kuvendit sesa ai mua”.
Ai shtoi se synimi i PDK-së është të sjellë “ndryshime reale, zhvillim dhe perspektivë për çdo qytetar”, duke hapur rrugën drejt integrimeve evropiane.
